Manylion y penderfyniad

Darparodd y Cyfarwyddwr Addysg a Gwasanaethau Cynhwysiant  wybodaeth i'r Aelodau am ganlyniadau'r ymgynghoriad diweddar yngl?n â'r cynnig i aildrefnu darpariaeth Dosbarthiadau Cymorth Dysgu (DCD) prif ffrwd yn Rhondda Cynon Taf (RhCT). Eglurwyd fod argyfwng Covid-19 wedi cael effaith andwyol ar allu'r Cyngor i gynnal ymgynghoriad ar y mater dan sylw, ac felly, cafodd dull gweithredu mwy hyblyg ei gynnig. Cynigiodd y Cyfarwyddwr y dylid arallgyfeirio'r cyllid er mwyn sefydlu darpariaeth amgen mewn pedair ysgol wahanol, a hynny er mwyn diwallu anghenion y disgyblion sydd fwyaf agored i niwed o'r gymuned leol.

Roedd yr Aelod o'r Cabinet ar faterion Addysg a Gwasanaethau Cynhwysiant yn falch o gefnogi'r cynnig o ystyried y sefyllfa sydd ohoni, a nododd y byddai'n cefnogi dysgwyr agored i niwed mewn ysgolion prif ffrwd. Roedd yr Aelod o'r Cabinet hefyd yn falch o nodi y byddai'r cynnig yn sicrhau bod darpariaeth ym mhob ardal yn RhCT tra hefyd yn rhoi cyfle i bob ysgol wneud cais. Aeth yr Aelod o'r Cabinet ymlaen i nodi yr hoffai hi weld ysgolion yn cyflwyno ceisiadau ar y cyd, a fyddai'n golygu bod modd ymestyn y cyllid yma, sydd er budd disgyblion agored i niwed, ymhellach.

Yn dilyn cwestiwn yngl?n â pha gymorth a gaiff ysgolion wrth wneud cais, eglurodd y Cyfarwyddwr fod proses drylwyr ar waith eisoes, a bydd hon yn destun gwaith pellach. Eglurwyd y byddai angen i ysgolion gyflwyno achos busnes manwl, gydag elfen o gyllid cyfatebol, ac y byddai hwn yn cael ei adolygu er mwyn sicrhau ei fod e'n bodloni'r meini prawf.

PENDERFYNODD y Cabinet:

1.    Nodi'r wybodaeth oedd wedi'i chynnwys yn yr adroddiad;

2.    Anwybyddu'r broses ymgynghori wreiddiol o ganlyniad i gyfyngiadau Covid-19 a'r effaith ar ddarpariaeth addysgol statudol ar gyfer y dyfodol rhagweladwy;

3.    Bwrw ymlaen â chynllun i ddarparu cyllid am ddwy flynedd i dair ysgol uwchradd Saesneg er mwyn sefydlu darpariaeth i ddysgwyr sydd ag Anawsterau Cymdeithasol, Emosiynol ac Ymddygiadol yn Ysgol Bryncelynnog, Ysgol Gymuned Glynrhedynog ac Ysgol Aberpennar;

4.    Bwrw ymlaen â chynnig diwygiedig i ddarparu cyllid am ddwy flynedd  er mwyn sefydlu darpariaeth uwchradd Cymraeg ar gyfer dysgwyr sydd ag anghenion cymhleth, gan gynnwys Anawsterau Cymdeithasol, Emosiynol ac Ymddygiadol yn Ysgol Gartholwg.